Sunday, January 28, 2018

பாகமதி - திரை விமர்சனம்!

SHARE

நடிகை அனுஷ்கா கதையின் நாயகியாக நடிக்க, அவரது நாயகராக உன்னி முகுந்தன் எனும் ஆஜானுபாகு புதுமுகம் அறிமுகம் ஆகிட, ஆர்.மதியின் ஒவிய ஓளிப்பதிவில், எஸ்.தமனின் அதிரடி இசையில் ஜி.அசோக் இயக்கத்தில் வெளிவந்திருக்கும் புராதானமும், புதுமையும் கலந்த காவியம் தான் "பாகமதி".

கதைப்படி, மாநில அரசுக்கு சொந்தமான சாமி சிலைகள் மர்மமான முறையில் கடத்தப்படுகின்றன. மாநில அரசு இதனை கண்டு பிடிக்காவிட்டால் தான் பதவி விலகுவேன்... என்று அறிவிக்கிறார் மத்திய அமைச்சர் ஜெயராம்.

இதையடுத்து அவரை, அரசியலை விட்டே ஓட விட வேண்டும் என்று திட்டம் தீட்டுகிறார் மாநில முதலமைச்சர். ஐ.ஏ.எஸ். அதிகாரியான ஆஷா சரத்தை அதற்காக பயன்படுத்துகிறார்.



கரைபடியா கரங்களுடன் மக்களுக்கு சேவை செய்யும் மனப்பான்மையில் இருக்கும் ஜெயராம் மீது குற்றம் சுமத்த போதிய சாட்சியங்கள் இல்லாததால், ஜெயராம் நிர்வாகத்தில் பணிபுரிந்த முன்னாள் ஐ.ஏ.எஸ். அதிகாரியான அனுஷ்காவை, ஜெயராமுக்கு எதிராக திருப்பிவிட திட்டம் தீட்டுகின்றனர்.

அனுஷ்கா, அவரது காதலரான உன்னி முகுந்தனை கொலை செய்ததாக குற்றம்சாட்டப்பட்டு சிறைத்தண்டனை அனுபவித்து வருகிறார். இந்நிலையில், அனுஷ்காவை ஆள்நடமாட்டம் இல்லாத பாகமதி அரண்மனையில் வைத்து விசாரிக்கின்றனர்.

முதலில் யாரோ தன்னை பயமுறுத்துவது போன்று உணரும் அனுஷ்கா. ஒரு சில நாட்களில் தான் அந்த அரண்மனையில் வாழ்ந்த அரசி பாகமதி என்றும், பாகமதியின் உடை மற்றும் அங்கிகளை எடுத்து அணிந்தபடியும் அங்குள்ளவர்களை பயமுறுத்துகிறார்.

இறுதியில் அங்கு என்ன நடந்தது? மறைந்த அரசி பாகமதிக்கும், அனுஷ்காவுக்கும் என்ன சம்பந்தம்? உண்மையிலேயே அங்கு பாகமதி எனும் ஆவி, அமானுஷ்ய சக்தி ஏதேனும் இருந்ததா? அனுஷ்காவின் ஆசை காதலன் உன்னி முகுந்தனை கொன்றது அனுஷ்காவே தானா..? மத்திய அமைச்சர் ஜெயராம் மெய்யாலுமே கறை படியாத கரத்திற்கு சொந்தகாரர் தானா..? என்பது உள்ளிட்ட இன்னும் பல வினாக்களுக்கு வித்தியாசமாக விடை அளிக்க முயன்றிருக்கிறது.

"பாகமதி" படத்தின் மீதிக்கதையும் களமும்! அதை இன்னும் சற்று விறு விறுப்பாகவும் காட்சிப்படுத்தியிருந்தால் "பாகமதி" மேலும் பட்டையை கிளப்பி இருக்கும்.

அதிகவரலாற்று காவியங்களில் நடித்துள்ள அனுஷ்கா, பாகமதி படத்திலும் அவரது கதாபாத்திரத்திற்கு வலுசேர்த்திருக்கிறார். ஐ.ஏ.எஸ். அதிகாரியாகவும், பாகமதியாகவும் அவர் சரியாக பொருந்தி நடித்திருக்கிறார்... என்றால் மிகையல்ல!



அதிலும், "உங்க பாஸ் மிஸ்டர் ஈஸ்வர் மூர்த்தி" எனும் சிபிஐ பெண் ஆபிஸரிடம், என் பாஸ் கவர்னர்..." என கம்பீரம் காட்டும் சஞ்சலா ஐஏஎஸ் ஆகவும் சரி., "எங்கடா போறது? எவன் வேணும்னாலும் வரலாம் எப்ப வேணும்னாலும் போலாங்க இது என்ன பரதேசி மடமா? பக பக பாகமதி இடம்!" என பாகமதியாக கர்ஜிப்பதிலும் சரி... சகலத்திலும் சக்கை போடுபோட்டிருக்கிறார் அம்மணி. அனுஷ்கா. வாவ்! வா ரே வா!

அனுஷ்காவின் ஜோடியாக வரும் வெளிநாட்டில் எம்பிஏ படித்து விட்டு இங்கு சேவை நோக்குடன் பணிபுரியவந்து பரிதாபமாக உயிரை விடும் உன்னி முகுந்தன் அவருக்கு கொடுத்த காட்சிகளையும் அவரதுபாத்திரத்தையும் வெகு சிறப்பாக செய்திருக்கிறார்.

மத்திய அமைச்சராக பன்முகங்கொண்ட பாத்திரத்தில் ஜெயராம் தன் முதிர்ந்த நடிப்பை பிரமாதமாக வெளிப்படுத்தியிருக்கிறார்.

"என்னை மினிஸ்டர் ஆக்கினவர்தானே உள்ளே இருக்கிறார்... அவர் கிட்டேயே பந்தா காமிச்சா எல்லாத்தையும் புடுங்கிட்டு அனுப்பிடுவார்..." என கோவிலுக்கு சாமி கும்பிட வந்த இடத்தில் பவ்யம் காட்டுவதில் தொடங்கி, அந்த சாமி சிலைகளையே ரகசியமாக கடத்துவது வரை ஜெய்ராம் சிறப்பான வில்லனாக ஜெயித்திருக்கிறார் என்றால் மிகையல்ல!

"எனக்கு நெகடீவ் வைபரேஷன் பிடிக்காது..." என்றபடி நெகடீவ் காரியங்களிலேயே ஈடுபட்டு க்ளைமாக்ஸில் பாஸிடீவ் ஆகும் சிபிஐ ஆபிஸராக வரும் ஆஷா சரத் அசத்தல்! மேலும், முரளி கிருஷ்ணா, தன்ராஜ் சுக்ராம், பிரபாஸ் ஸ்ரீனு, தலைவாசல் விஜய்... ஆகியோர் தங்களுக்கு கொடுத்த வேலயயை மிக கச்சிதமாக செய்திருக்கின்றனர்.

ஆர்.மதியின் ஒளிப்பதிவில் காட்சிகள் ஓவியா மாக, இப்படத்தை காவியமாக்க முயன்றிருப்பது பெரும் பலம். எஸ்.தமனின் பின்னணி இசை படத்திற்கு பலம் சேர்த்திருக்கிறது. பாடல்களும் தாளம் போட்டு கேட்கும் ரகம் என்பது ஆறுதல்.


தான் படித்த அரசி பாகமதியின் வரலாற்றை வைத்தே தன் புத்திசாலிதனத்தால், தவறானவர்களுக்கு தண்டனை வாங்கித் தரும் ஐஏஎஸ் பெண் அதிகாரியின் பாத்தி ரத்தையே கதையின் நாயகி ஆக்கி, பாகமதி என்பது யார்? அவரது கதாபாத்திரத்தை வைத்து திகில் நிரம்பிய ஹிஸ்டா ரிக்கல் லவ், ஆக்ஷன் படத்தை எவ்வாறு? வெரைட்டியாக தரமுடியும்..? என யோசித்ததற்காகவே இயக்குனர் ஜி.அசோக்கை எத்தனைக்கு எத்தனை பாராட்டினாலும் தகும்.

மற்றபடி, "இந்த பாகமதி பங்களா., கெஸ்ட் ஹவுஸ் இல்லை... கோஸ்ட் ஹவுஸ்...." என்பது உள்ளிட்ட டயலாக் 'பன்ச்'கள் ரசனை.

அதே நேரம், இவரது இயக்கத்தில் படம் முழுக்க திகில் காட்சிகள் திருப்திபடுத்தும்படி இருக்கின்றன என்றாலும் படத்தின் திரைக்கதையில் இன்னும் கொஞ்சம் வேகமும் கவனமும் இருந்திருந்தால், பாகமதி-பாசுமதி அரிசியில் செய்த சாம்பார் சாதமாக இல்லாமல், பிரியாணியாக ரசிகனுக்கு இன்னும் சிறப்பான விருந்தளித்திருக்கும் என்பது நம் கருத்து.

மொத்தத்தில் "பாகமதி' படத்தை, 'அனுஷ்காவிற்காகவும், வித்தியாசமான கதைக்காவும் ஒரு முறை பார்க்கலாம்!"
SHARE