Wednesday, April 17, 2019

ராஜஸ்தானை 2 ஆவது முறையாகவும் வீழ்த்தியது கிங்ஸ் லெவன் பஞ்சாப்!

SHARE

ஐ.பி.எல். 12 தொடரின் 32 ஆவது போட்டியில் கிங்ஸ்லெவன் பஞ்சாப் அணிக்கு பதிலடி கொடுக்கும் நோக்குடன் களமிறங்கிய ராஜஸ்தான் ரோயல்ஸ் அணியை பஞ்சாப் அணி 12 ஓட்டங்களால் தோற்கடித்தது.

இரு அணிகளுக்குமிடையிலான போட்டி நேற்றிரவு 8 மணிக்கு மொஹாலியிலுள்ள பிந்ரா மைதானத்தில் இடம்பெற்றது.

கிங்ஸ் லெவன் பஞ்சாப் அணிக்கு ரவிச்சந்திரன் அஸ்வினும் ராஜஸ்தான் ரோயல்ஸ் அணிக்கு ரஹானேவும் தலைமை தாங்கினர்.   

8 அணிகள் இடையிலான 12ஆவது ஐ.பி.எல். கிரிக்கெட் போட்டி இந்தியாவின் பல்வேறு நகரங்களில் இடம்பெற்று வருகிறது. இதில் நேற்றிரவு மொகாலியில் அரங்கேறிய 32 ஆவது லீக் போட்டியில் கிங்ஸ் லெவன் பஞ்சாப் அணி, முன்னாள் சாம்பியன் ராஜஸ்தான் ரோயல்ஸுடன்  மோதியது.

ராஜஸ்தான் அணியில் மூன்று மாற்றங்கள் செய்யப்பட்டன. ஸ்டீவன் சுமித், லியாம் லிவிங்ஸ்டோன், கே.கவுதம் ஆகியோர் கழற்றிவிடப்பட்டு அவர்களுக்கு பதிலாக ஸ்டூவர்ட் பின்னி, சோதி மற்றும் அறிமுக வீரராக ஆஷ்டன் டர்னர் சேர்க்கப்பட்டனர்.

பஞ்சாப் அணியில் சாம் குர்ரன், சர்ப்ராஸ் கான், ஆண்ட்ரூ டை ஆகியோருக்கு பதிலாக டேவிட் மில்லர், முஜீப் ரகுமான், அர்ஷ்தீப் சிங் உள்ளிட்டோர் இடம் பிடித்தனர்.

நாணயச்சுழற்சியில் வெற்றிபெற்ற ராஜஸ்தான் அணித் தலைவர் ரஹானே முதலில் பந்து வீச்சை தேர்வு செய்தார்.

இதன்படி கிறிஸ் கெய்லும், லோகேஷ் ராகுலும் பஞ்சாப் அணியின் இன்னிங்சை ஆரம்பித்தனர். உனட்கட்டின் பந்து வீச்சில் 2 சிக்சர்களை விளாசிய கெய்ல் சற்று நிதானமாக செயல்பட்டார். 6 ஆவது ஓவர் வரை களத்தில் நின்ற கெய்ல் (30 ஓட்டங்களுக்கு , 22 பந்து, 2 பவுண்டரி, 3 சிக்சர்) ஜோப்ரா ஆர்ச்சரின் வேகப்பந்து வீச்சில் விக்கெட் கீப்பர் சஞ்சு சாம்சனிடம் பிடிகொடுத்து ஆட்டமிழந்து வெளியேறினார். அடுத்து வந்த மயங்க் அகர்வால் 26 ஓட்டங்கள் (12 பந்து, ஒரு பவுண்டரி, 2 சிக்சர்) விளாசினார்.

இதையடுத்து 3 ஆவது விக்கெட்டுக்கு, தடுமாறிக்கொண்டிருந்த மற்றொரு ஆரம்ப ஆட்டக்காரர் லோகேஷ் ராகுலுடன் டேவிட் மில்லர் கைகோர்த்தார். இருவரும் ஓட்ட எண்ணிக்கையை  உயர்த்துவதில் கவனம் செலுத்தினர். சோதி, உனட்கட்டின் ஓவர்களில் சிக்சர்கள் விரட்டிய இவர்கள் ஓட்ட எண்ணிக்கையை மிகவேகமாக உயர்த்தினர்.

அணியின் ஸ்கோர் 152 ஓட்டங்களாக உயர்ந்த போது ராகுல் 52 ஓட்டங்களுடன் (47 பந்து, 3 பவுண்டரி, 2 சிக்சர்) பிடிகொடுத்து ஆட்டமிழந்தார். அதைத் தொடர்ந்து நிகோலஸ் பூரன் (5), மன்தீப்சிங் (0) அடுத்தடுத்து வெளியேறினர். இறுதி ஓவரின் முதல் பந்தில் டேவிட் மில்லர் (40 ஓட்டங்கள் , 27 பந்து, 2 பவுண்டரி, 2 சிக்சர்) ஆட்டம் இழந்தார். அதிர்ஷ்டவசமாக எஞ்சிய பந்துகளை எதிர்கொண்ட அணித் தலைவர் அஸ்வின் ஒரு பவுண்டரியும், 2 சிக்சரும் விரட்டி பஞ்சாப் அணி சவாலான ஓட்ட எண்ணிக்கையை அடைவதற்கு உதவினார்.

20 ஓவர் முடிவில் பஞ்சாப் அணி 6 விக்கெட் இழப்புக்கு 182 ஓட்டங்களை குவித்தது. அஸ்வின் 17 ஓட்டங்களுடன் ஆட்டமிழக்காது இருந்தார். ராஜஸ்தான் தரப்பில் வேகப்பந்து வீச்சாளர் ஜோப்ரா ஆர்ச்சர் 4 ஓவர்களில் 15 ஓட்டற்களை மாத்திரம் விட்டுக்கொடுத்து 3 விக்கெட்டுகளை சாய்த்தார்.

பின்னர் 183 ஓட்டங்களைப் பெற்றால் வெற்றி என்ற இலக்கை நோக்கி ராஜஸ்தான் அணி தனது இன்னிங்ஸை ஆரம்பித்தது. ஆரம்ப ஆட்டக்காரர் ஜோஸ் பட்லர் 23 ஓட்டங்களுடன் (17 பந்து, ஒரு பவுண்டரி, 2 சிக்சர்) பிகொடுத்து ஆட்டமிழந்தார். அடுத்து சஞ்சு சாம்சனும், ராகுல் திரிபாதியும் ஜோடி சேர்ந்து அணியை சரிவில் இருந்து மீட்டனர். இவர்கள் ஆடிய விதம் அந்த அணிக்கு நம்பிக்கை அளிப்பது போல் இருந்தது. ஓட்ட எண்ணிக்கை 97 ஆக இருந்தபோது (11.4 ஓவர்) இந்த ஜோடியை சுழற்பந்து வீச்சாளர் அஸ்வின் பிரித்தார். அவரது பந்து வீச்சில் சாம்சன் (27 ஓட்டங்கள்)  போல்ட் முறையில் ஆட்டமிழந்தார்.

அதன் பிறகு பஞ்சாப் அணியின் பந்துவீச்சாளர்கள்  கொடுத்த நெருக்கடியில் ராஜஸ்தான் திகைத்து போனது. திரிபாதி 50 ஓட்டங்களுடனும் (45 பந்து, 4 பவுண்டரி), அறிமுக வீரர் டர்னர் ஓட்டமெதுவுமின்றியும் ஜோப்ரா ஆர்ச்சர் ஒரு ஓட்டத்துடனும் அணித் தலைவர் ரஹானே 26 ஓட்டங்களுடனும் வெளியேறினர். இறுதி ஓவரில் ராஜஸ்தானின் வெற்றிக்கு 23 ஓட்டங்கள்  தேவைப்பட்டது. இந்த ஓவரில் அந்த அணி ஸ்ரேயாஸ் கோபாலின் (0) விக்கெட்டை பறிகொடுத்து 10 ஓட்டங்களை மாத்திரம் பெற்றுக்கொண்டது.

20 ஓவர் முடிவில் ராஜஸ்தான் அணியால் 7 விக்கெட் இழப்புக்கு 170 ஓட்டங்களையே எடுக்க முடிந்தது. இதன் மூலம் பஞ்சாப் அணி 12 ஓட்டங்கள் வித்தியாசத்தில் வெற்றி பெற்றது. 9 ஆவது ஆட்டத்தில் ஆடிய பஞ்சாப் அணிக்கு இது 5 ஆவது வெற்றியாகும். ராஜஸ்தான் அணி சந்தித்த 6 ஆவது தோல்வியாகும். இந்த சீசனில் 2 ஆவது முறையாக பஞ்சாப்பிடம் தோற்றுள்ளது ராஜஸ்தான் ரோயல்ஸ்.

இப்போட்டியின் ஆட்டநாயகனாக பஞ்சாப் அணியின் தலைவர் அஸ்வின் தெரிவு செய்யப்பட்டார்.
SHARE