Friday, November 16, 2018

ஜனாதிபதிக்கு எதிராக சட்ட நடவடிக்கை – சுமந்திரன் எச்சரிக்கை!

ஜனாதிபதிக்கு எதிராக சட்ட நடவடிக்கை – சுமந்திரன் எச்சரிக்கை!


மஹிந்த ராஜபக்ஷவிற்கு எதிரான நம்பிக்கையில்லாப் பிரேரணை மூன்றாவது தடவையாகவும் பெரும்பான்மை வாக்குகளால் நிறைவேற்றப்பட்டுள்ள நிலையில் அவரை, பதவி நீக்கம் செய்யாவிட்டால் ஜனாதிபதிக்கு எதிராக சட்ட நடவடிக்கை எடுக்க நேரிடுமென, தமிழ்த் தேசியக் கூட்டமைப்பின் நாடாளுமன்ற உறுப்பினர் எம்.ஏ சுமந்திரன் தெரிவித்துள்ளார்.

நாடாளுமன்றத்தில் இன்று(வெள்ளிக்கிழமை) இடம்பெற்ற குழப்பநிலையினைத் தொடர்ந்து சபை அமர்வுகள் எதிர்வரும் 19ஆம் திகதி வரை ஒத்திவைக்கப்பட்டுள்ளன.

இதனைத் தொடர்ந்து நாடாளுமன்ற வளாகத்தில் இடம்பெற்ற ஊடகவியலாளர்கள் சந்திப்பில் கலந்து கொண்டு கருத்து வெளியிடும் போதே எம்.ஏ சுமந்திரன் மேற்கண்டவாறு தெரிவித்துள்ளார்.

இதன்போது அங்கு தொடர்ந்தும் கருத்து வெளியிட்ட அவர், “மஹிந்த ராஜபக்ஷவை, ஜனாதிபதி மைத்திரிபால சிறிசேன, அரசமைப்புக்கு முரணாகவே நியமித்துள்ளார். இங்கு ஜனாதிபதியே அரசமைப்பை மீறியுள்ளார்.

இது சட்டவிரோதமானது, ஜனநாயகத்துக்கு முரணானது. இதனை எம்மால் ஏற்றுக்கொள்ளமுடியாது. எனவே, இதனை எதிர்த்தோம். இது தொடர்பில் நாம், ஜனாதிபதியை சந்தித்தபோது எமது தீர்மானத்தை மாற்றக் கோரினார். இல்லாதுவிட்டால் நடுநிலைமை வகிக்குமாறு கோரினார். நாம் யாருக்கும் ஆதரவானவர்கள் அல்லர்.

அரசமைப்பு, சட்டம் ஜனநாயக விழுமியங்களின் அடிப்படையில் காரியங்கள் இடம்பெறவேண்டும் என்பதே எமது நோக்கம். அதனடிப்படையிலேயே, பிரதமராக மஹிந்த ராஜபக்ஷ அரசமைப்புக்கு முரணாக நியமிக்கப்பட்ட விடயத்தில் நாம், மூன்றாவது தடவையாகவும் நம்பிக்கையில்லாப் பிரேரணை கொண்டுவந்து பெரும்பான்மை வாக்குகளால் நிறைவேற்றியுள்ளோம்.

எனவே, மஹிந்த ராஜபக்ஷவை பிரதமர் பதவிலிருந்து நீக்க ஜனாதிபதி உடனடியாக நடவடிக்கை எடுக்கவேண்டும். இல்லையே ஜனாதிபதிக்கு எதிராக சட்ட நடவடிக்கை எடுக்க நேரிடும்“ என தெரிவித்துள்ளார்.
நாடாளுமன்றில் பொலிஸார் மீதும் கடும் தாக்குதல்! (Video)

நாடாளுமன்றில் பொலிஸார் மீதும் கடும் தாக்குதல்! (Video)


இன்று நாடாளுமன்றம் கூட்டப்பட்டபோது மகிந்த ராஜபக்ச தரப்பினர் பெரும் குழப்பங்களை ஏற்படுத்தினர். குறிப்பாக பொலிஸார் மீதான தாக்குதலில் தேசிய சுதந்திர முன்னணியின் நாடாளுமன்ற உறுப்பினர்கள் விமல் வீரவங்ச மற்றும் ஜயந்த சமரவீர ஆகியோர்  ஈடுபட்டதைக் காணக்கூடியதாக இருந்தது.

சபாநாயகரை நோக்கி ஜொன்ஸ்டன் பெர்னாண்டோ எறிந்த கதிரை பொலிஸார்மீது விழுந்ததனால் பொலிஸார் சிலர் காயமடைந்தனர் என்று தெரிவிக்கப்படுகிறது.

சபாநாயகர் கரு ஜயசூரிய தனது ஆசனத்தில் அமர்ந்து மகிந்த ராஜபக்ச மீதான நம்பிக்கையில்லாத தீர்மானத்தினை 3வது தடவையாகவும் நிறைவேற்றியபோது மகிந்த  தரப்பினர் கடுமையான அட்டகாசத்தில் ஈடுபட்டனர்.

இதன்போது மகிந்த தரப்பினரிடமிருந்து சபாநாயகரைப் பாதுக்காக்க முயன்ற பொலிஸார் மீது கடும்தாக்குதல் மேற்கொள்ளப்பட்டதுடன் அவர்கள் மீதும் மிளகாய்த்தூள் கரைத்த நீர்கொண்டு தாக்குதல் நடத்தப்பட்டது.

ஏற்கனவே ஐக்கிய தேசியக்கட்சியின் நாடாளுமன்ற உறுப்பினரான காமினி ஜெயவிக்கிரம பெரேரா மற்றும் மக்கள் விடுதலை முன்னணியின் நாடாளுமன்ற உறுப்பினர் விஜித ஹேரத் மீதும்  மிளகாய்த்தூள் தாக்குதல் மேற்கொள்ளப்பட்டது என்று  நாடாளுமன்றச் செய்தியாளர் தெரிவித்தார்.






நாடாளுமன்றத்திற்காக உயிரையும் கொடுப்பேன் – சபாநாயகர்!

நாடாளுமன்றத்திற்காக உயிரையும் கொடுப்பேன் – சபாநாயகர்!


நாடாளுமன்றத்திற்காக உயிரையும் கொடுக்க தயார் என சபாநாயகர் கரு ஜயசூரிய தெரிவித்துள்ளார்.

நாடாளுமன்றத்தில் இன்று(வெள்ளிக்கிழமை) இடம்பெற்ற குழப்பநிலையினைத் தொடர்ந்து சபை அமர்வுகள் எதிர்வரும் 19ஆம் திகதி வரை ஒத்திவைக்கப்பட்டுள்ளன.

இந்தநிலையில் இன்றைய தினம் நாடாளுமன்றத்தில் இடம்பெற்ற குழப்ப நிலை தொடர்பில் வெளியிட்டுள்ள கண்டன அறிக்கையிலேயே சபாநாயகர் கரு ஜயசூரிய மேற்கண்டவாறு தெரிவித்துள்ளார்.

அச்சுறுத்தல்கள் மற்றும் மிரட்டல்கள் உள்ளிட்ட அனைத்து வகையான சவால்களையும் எதிர்கொண்டு நாடாளுமன்றத்தின் ஜனநாயகத்தை பாதுகாப்பதற்கு உயிரைக் கொடுத்தேனும் செயற்படுவேன் என அவர் இதன்போது குறிப்பிட்டுள்ளார்.

மேலும் நாட்டை நேசிக்கும் அனைத்து இன மக்களும் பொறுப்புணர்வுடனும் அமைதியாகவும் செயற்பட வேண்டும் எனவும் அவர் கேட்டுக் கொண்டுள்ளார்.
நாடாளுமன்றத்தில் மோதல் – விஜித ஹேரத் உள்ளிட்ட நால்வர் காயம்!

நாடாளுமன்றத்தில் மோதல் – விஜித ஹேரத் உள்ளிட்ட நால்வர் காயம்!



நாடாளுமன்றத்தில் இன்று(வெள்ளிக்கிழமை) இடம்பெற்ற மோதலில் மக்கள் விடுதலை முன்னணியின் நாடாளுமன்ற உறுப்பினர் விஜித ஹேரத் காயமடைந்துள்ளார்.

இன்று நண்பகல் 1.30 மணிக்கு நாடாளுமன்ற அமர்வுகள் ஆரம்பமாவதற்கு முன்னர் அரச தரப்பின் நாடாளுமன்ற உறுப்பினரான அருந்திக்க பெர்ணாண்டோ சபாநாயகரின் ஆசனத்தில் அமர்ந்ததுடன், அரச தரப்பினர் சபநாயகரின் ஆசனத்தினை சூழ்ந்து கொண்டு குழப்பம் ஏற்படுத்தினர்.

நேற்றைய நாடாளுமன்ற அமர்வின் போது கத்தியுடன் சபைக்கு வருகை தந்த ஐக்கிய தேசிய கட்சியின் நாடாளுமன்ற உறுப்பினரான பாலித தெவரப்பெருமையை கைது செய்யுமாறு வலியுறுத்தி அரச தரப்பினர் இவ்வாறு நாடாளுமன்றத்தில் குழப்பத்தினை ஏற்படுத்தினர்.

இதன்போதே விஜித ஹேரத் காயமடைந்துள்ளார். அத்துடன், சபாநாயகர் மற்றும் செங்கோலின் பாதுகாப்புக்காக, சபைக்குள் பிரவேசித்த பொலிஸார் மீது மகிந்த ராஜபக்ச தரப்பினர் நடத்திய தாக்குதலில் மூன்று பொலிஸார் காயமடைந்துள்ளனர்.

இதேவேளை, நாடாளுமன்றில் இன்று இடம்பெற்ற குழப்ப நிலையினைத்தொடர்ந்து நாடாளுமன்ற அமர்வுகள் எதிர்வரும் 19ஆம் திகதி வரை ஒத்திவைக்கப்பட்டுள்ளமைக் குறிப்பிடத்தக்கது.




கொலை வெறித்தாக்குதலை ஊக்குவிக்க மஹிந்த அவசரமாக ஹெலிகொப்டரில் வந்திறங்கினார் : ராஜித தகவல்

கொலை வெறித்தாக்குதலை ஊக்குவிக்க மஹிந்த அவசரமாக ஹெலிகொப்டரில் வந்திறங்கினார் : ராஜித தகவல்


பாராளுமன்றில் இன்று மஹிந்த ராஜபக்ஷவின் கொலைவெறி கொண்ட குழுவினர் அராஜகமாக நடந்துகொண்டதை, மேலும் ஊக்குவிப்பதற்காக மஹிந்த ராஜபக்ஷ அவசரமாக பாராளுமன்றுக்கு ஹெலிகொப்டரில் வந்திறங்கியதாக முன்னாள் அமைச்சர் ராஜித சேனாரட்ன தெரிவித்தார்.சாதாரண தரப் பரீட்சையில் கூட தோற்றாத படிப்பறிவற்ற மீன் வியாபாரம், குடு, கசிப்பு விற்பனை செய்த சிலரே இன்று பாராளுமன்றில் அராஜகத்தில் முன்னின்று செயற்பட்டனர் எனவும் குறிப்பிட்டார்.

பாராளுமன்றில் இன்று ஏற்பட்ட அமைதியின்மையை தொடர்ந்து ஊடகவியலாளர்களிடம் கருத்து தெரிவிக்கும் போதே அவர் இதனைத் தெரிவித்தார்.

தொடர்ந்து கருத்து தெரிவித்த அவர்,

ஜனாதிபதியான இருந்த எனக்கு பிரதமர் பதவி ஆசையில்லை என்று கூறும் மஹிந்த ராஜபக்ஷ, பெரும்பான்மை இல்லாத போதும் ஏன் பதவியை தக்கவைத்துக்கொள்ள முயற்சிக்கின்றார். 

உண்மையில் மஹிந்த ராஜபக்ஷ ஜனநாயகத்தையும், அரசியலமைப்பையும் மதிப்பவராக இருந்தால் அவராக பதவியை ராஜினாமா செய்து செல்ல வேண்டும்.

அவ்வாறு செய்திருந்தால் நாட்டு மக்கள் அல்ல உலகமே பாராட்டியிருக்கும்.

ஆனால் மிகவும் கீழ்த்தரமாக நடந்துகொண்டுள்ளனர்.மனிதப் படுகொலைகளையும், பாரிய கொள்ளைகளையும் செய்த சிலருக்கு எதிராக நீதிமன்றங்களில் வழங்குத்தாக்கல்கள் நிலுவையில் உள்ளன.அதிலிருந்து தப்பித்துக்கொள்ளவே மீண்டும் கொலைவெறியுடன் இன்று பாராளுமன்றில் நடந்துகொள்கின்றனர்.

மேற்குல நாடுகளில் எவ்வாறான பாராளுமன்ற முறைமை இருக்கின்றது என்று கூட தெரியாதவர்களே இன்று எமது பாராளுமன்றில் இருக்கின்றனர்.

சிறிதளவும் படிப்பறிவு அற்ற இவர்களுடன் சேர்ந்து அரசியல் செய்யும் நிலைமை எமக்கு ஏற்பட்டுள்ளது.
மஹிந்தவை பிரதமராக நியமித்தமை வரவேற்கத்தக்கது -இலங்கைக்கான உலக மையம்!

மஹிந்தவை பிரதமராக நியமித்தமை வரவேற்கத்தக்கது -இலங்கைக்கான உலக மையம்!


ஜனாதிபதி  மைத்திரிபால   சிறிசேன  ஆட்சி  மாற்றத்தினை   ஏற்படுத்தியுள்ளமை   வரவேற்கத்தக்கது.தேசிய  அரசாங்கம்     கடந்த   மூன்று   வருடகாலமாக   நாட்டுக்காக    செயற்படாமல்  மேற்குலக நாடுகளின்   தேவைகளுக்கு மாத்திமே செயற்பட்டது    என   இலங்கைக்கான உலக மையம் குறிப்பிட்டுள்ளது.

உலக மையத்தின் இலங்கைக்கான செயற்பாட்டாளர்    பேராசிரியர்  ஜகத்   சந்ரவசம்      குறிப்பிடுகையில்.

அடுத்த   வருடம்    நாடு  சர்வதேசத்தில்  எதிர்கொள்ளவிருந்த   பாதக விளைவுகளை   தடுக்கவே   ஜனாதிபதி  ஆட்சி மாற்றத்தினை ஏற்படுத்தியுள்ளார்.   இவ்விடயம் தொடர்பில் இரு  தரப்பினருக்குமிடையில் மாறுப்பட்ட      தர்க்கங்கள்  காணப்பட்டாலும்    இதற்கான அவசியத்தினை புரிந்துக்  கொள்ள வேண்டும். அரசியல் நெருக்கடிகள் ஏற்பட்டிருக்கும்    பட்சத்தில்      அரசியல்வாதிகள் தமது தேவைகளை தக்கவைத்துக் கொள்ள   செயற்படாமல்   ஜனநாயகத்தினை பாதுகாக்க முன்வரவேண்டும்.

ஜனாதிபதி   மைத்தரிபால சிறிசேன  ஆட்சி மாற்றத்தினை   ஏற்படுத்தியமைக்கான  காரணத்தை  மக்களுக்கு  குறிப்பிட்டதன்  பின்னணியில்   பல  விடயங்கள்  எடுத்துரைக்கப்பட்டுள்ளது.    முன்னாள்   பிரதமர்   ரணில்     விக்ரமசிங்க மேற்குலக  நாடுகளுக்கான     பிரதிநிதியாகவே   செயற்பட்டுள்ளார்   என்பதை     ஆட்சி     மாற்றம்  ஏற்பட்டதை   தொடர்ந்து    சர்வதேசங்கள்     அடைந்த அதிருப்தியினூடாக தெரிந்துக் கொள்ளலாம்.
மஹிந்த ஒரு ஜனநாயக விரோதி: சம்பந்தன் சாடல்!

மஹிந்த ஒரு ஜனநாயக விரோதி: சம்பந்தன் சாடல்!



மஹிந்த ராஜபக்ஷ உடனடியாக பதவியிலிருந்து விலக வேண்டும். இல்லையேல் ஜனநாயக விரோதியாக கருதப்படுவார் என எதிர்க்கட்சி தலைவர் இரா.சம்பந்தன் சாடியுள்ளார்.

நாடாளுமன்றம் இன்று (வெள்ளிக்கிழமை) ஒத்திவைக்கப்பட்டதன் பின்னர் ஊடகங்களுக்கு கருத்து தெரிவிக்கையிலேயே அவர் இவ்வாறு குறிப்பிட்டார்.

அங்கு தொடர்ந்து தெரிவித்த எதிர்க்கட்சி தலைவர், ”கடந்த மாதம் 26ஆம் திகதி ஜனாதிபதியினால் மஹிந்த ராஜபக்ஷ பிரதமராக நியமிக்கப்பட்டதிலிருந்தே இந்த பிரச்சினைகள் தோற்றம் பெற்றன.

இப்பிரச்சினையை முடிவுக்கு கொண்டு பிரதமராக நியமிக்கப்பட்ட மஹிந்த ராஜபக்ஷ நாடாளுமன்றத்தில் பெரும்பான்மையை நிரூபித்திருக்க வேண்டும். ஆனால், அந்த ஜனநாயக கடமையை நிறைவேற்ற அவர் தவறிவிட்டார்.

இந்நிலையில், மஹிந்த ராஜபக்ஷ மீதும் அவருக்கு வழங்கப்பட்ட பதவி மீதும் நம்பிக்கை இல்லை என நாடாளுமன்றத்தில் இன்றுடன் மூன்று முறை தீர்மானம் நிறைவேற்றப்பட்டுள்ளது.

எனவே, மஹிந்த ராஜபக்ஷ உடனடியாக தனது பதவியிலிருந்து விலக வேண்டும். அவர் மாத்திரமின்றி அமைச்சர்களாக நியமிக்கப்பட்டவர்களும் பதவி விலக வேண்டும். அவர்களுக்கு அப்பதவிகளில் நீடிக்க இனியும் உரிமை இல்லை. அவர்கள் பதவி விலகாவிடின் ஜனநாயக விரோதிகளாக கருதப்படுவர்” எனத் தெரிவித்தார்.

ஐ.தே.க நாடாளுமன்ற உறுப்பினர் மீது மிளகாய்த்தூள் தாக்குதல்!

ஐ.தே.க நாடாளுமன்ற உறுப்பினர் மீது மிளகாய்த்தூள் தாக்குதல்!


ஐக்கிய தேசிய கட்சியின் நாடாளுமன்ற உறுப்பினரான காமினி ஜெயவிக்கிரம பெரேரா மீது மிளகாய்த்தூள் தாக்குதல் மேற்கொள்ளப்பட்டுள்ளது.

மகிந்த தரப்பினரால் இந்தத் தாக்குதல் மேற்கொள்ளப்பட்டுள்ளதாக  நாடாளுமன்றச் செய்தியாளர் தெரிவித்தார்.

அத்துடன், மக்கள் விடுதலை முன்னணியின் நாடாளுமன்ற உறுப்பினர் விஜித ஹேரத்மீதும் இவ்வாறு மிளகாய்த்தூள் தாக்குதல் மேற்கொள்ளப்பட்டுள்ளது.

இந்தத் தாக்குதல் குறித்து நாடாளுமன்ற உறுப்பினர் காமினி ஜெயவிக்கிரம பெரேரா(வயது77)கண்ணீர்மல்க ஊடகவியலாளரிடம் தெரிவித்தார்.

இன்றையதினம் நாடாளுமன்றம் கூட்டப்பட்டு மகிந்த ராஜபக்ஸவிற்கு எதிராக நம்பிக்கையில்லாப் பிரேரணை கொண்டுவரப்பட்டு அது நிறைவேறிய நிலையிலேயே மகிந்த தரப்பினரால் சபை நடவடிக்கைகள் குழப்பப்பட்டு பெரும் அமளி துமளி ஏற்பட்டது.


நிறைவேற்றப்பட்டது தீர்மானம் ; பாராளுமன்றம் ஒத்திவைக்கப்பட்டது

நிறைவேற்றப்பட்டது தீர்மானம் ; பாராளுமன்றம் ஒத்திவைக்கப்பட்டது


மகிந்த ராஜபக்ச அரசாங்கத்திற்கு எதிரான நம்பிக்கையில்லா தீர்மானம் நிறைவேற்றப்பட்டுள்ளது  என சபாநாயகர் தெரிவித்துள்ளார்.

பாராளுமன்ற உறுப்பினர் சுமந்திரனின் தீர்மானம் பெரும்பான்மையுடன் நிறைவேற்றப்பட்டது என அவர் குறிப்பிட்டுள்ளார்.

19 ம் திகதி பிற்பகல் 01 மணி வரை பாராளுமன்றம் ஒத்திவைக்கப்பட்டுள்ளதாக அவர் தெரிவித்துள்ளார்.
பாராளுமன்றம் கூடியது - அமளி துமளி..! (Live video)

பாராளுமன்றம் கூடியது - அமளி துமளி..! (Live video)



பாராளுமன்றம் சற்று முன்னர் கூடியது.

இதனை அடுத்து ஆளும் தரப்பு பாராளுமன்ற உறுப்பினர்கள் அமளி துமளியில் தற்போது ஈடுபட்டுள்ளனர்.

மேலும், எதிர்தரப்பு பாராளுமன்ற உறுப்பினர்கள் தமது ஆசனங்களில் அமர்ந்துள்ளதாக  செய்தியாளர் தெரிவிக்கின்றார்.

இந்நிலையில் பாராளுமன்ற அமர்வுக்காக இன்று (16) வருகை தரும் உறுப்பினர்கள் பாதுகாப்பு பரிசோதனைகளின் பின்னர் அமர்வில் கலந்து கொள்ள அனுமதிக்கப்பட்டனர்.

பாராளுமன்றத்தில் ​நேற்று கூடிய போது அமைதியற்ற சூழ்நிலை தோன்றியதுடன் அங்கு கைகலப்பு ஏற்பட்டது.

மேலும் கூரிய ஆயுதங்களுடன் பாராளுமன்ற உறுப்பினர்கள் காணடப்பட்டமையால் இன்று சபை அமர்வுக்காக வருகை தரும் உறுப்பினர்கள் பாதுகாப்பு பரிசோதனைகளுக்கு உட்படுத்தப்பட்டமை குறிப்பிடத்தக்கது.